O maior telescopio para o descubrimento de vida

Tras cinco anos de obras e un investimento de 1.200 millóns de yuans (160 millóns de euros), este domingo entrou en funcionamento en China o maior telescopio do mundo. Con esta xigantesca estrutura de 500 metros de diámetro, formada por 4.450 paneis reflectores que ocuparían 30 campos de fútbol, os científicos chineses explorarán o espazo e buscarán vida extraterrestre.

Superando amplamente ao telescopio de Arecibo en Porto Rico, que ata agora era o maior do mundo cos seus 350 metros de diámetro, o autoritario réxime de Pequín dá un paso máis na súa ambiciosa carreira espacial. Denominado oficialmente FAST (siglas en inglés de Telescopio de Apertura Esférica de 500 Metros), o enxeño xa foi alcumado «Tianyan», que en mandarín significa «O ollo do ceo». Grazas á mellora da súa sensibilidade, que dobra á do observatorio de Arecibo e aumenta dez veces a súa velocidade de rastrexo, o novo radiotelescopio detectará púlsares no espazo e moléculas interestelares na súa procura de signos de comunicación alieníxena.